اسٹیٹ بینک آف پاکستان کا ویمن انٹرپرینیورشپ ڈے منانے کا اعلان

بہاول پور( نامہ نگار )اسٹیٹ بینک آف پاکستان ملک بھر میں 3 دسمبر 2025 کو پاکستان ویمن انٹرپرینیورشپ ڈے منائے گا۔ مرکزی تقریب اسٹیٹ بینک کراچی میں منعقد ہوگی، جہاں گورنر اسٹیٹ بینک جمیل احمد خصوصی خطاب کریں گے، جبکہ اسی روز اسٹیٹ بینک کے 16 فیلڈ آفسز میں بھی تقریبات کا انعقاد کیا جائے گا۔ بہاولپور میں یہ تقریب اسٹیٹ بینک آف پاکستان بی ایس سی بہاولپور اور پنجاب کونسل آف دی آرٹس کے اشتراک سے منعقد ہوگی۔ تقریب میں خواتین کی مالی شمولیت، کاروباری ترقی اور خواتین کے لیے مخصوص فنانسنگ سہولیات سے متعلق کامیابیوں کا جشن منایا جائے گا۔ گزشتہ سال کی کامیابیوں میں 1,500 سے زائد خواتین سے رابطہ، خواتین کے لیے 24 ارب روپے سے زیادہ کی فنانسنگ، اور 800 سے زائد کاروباری آئیڈیاز کا حصول شامل تھا۔ اس سال بھی ملک بھر میں آگاہی سیشنز، اکانٹ اوپننگ ڈرائیوز اور خواتین کے لیے خصوصی فنانسنگ پروڈکٹس کا اعلان کیا جا رہا ہے۔ قومی سطح کی سرگرمیوں کے مطابق بہاولپور کی تقریب میں بھی خواتین کے کاروباری اسٹالز، آگاہی سیشنز اور نمایاں خواتین کاروباری شخصیات و بینکوں کے لیے اعزازی سرٹیفکیٹس شامل ہوں گے۔ PWED کا مقصد خواتین کو معاشی طور پر بااختیار بنانا، کاروباری مواقع تک ان کی رسائی بڑھانا اور مالی و ڈیجیٹل شمولیت کو فروغ دینا ہے-