قصور(خالد نواز خان سے )ڈسٹرکٹ ہسپتال کے مین گیٹ اور سٹیل باغ چوک میں رکشوں اور مزدا ویگنوں کے غیر قانونی سٹینڈ قائم۔ٹریفک جام ہونے کے باعث مریضوں کو ہسپتال لانے میں شدید مشکلات اور مریضوں کی زندگیاں خطرے میں پڑ گئیں۔ شہریوں نے ڈپٹی کمشنر قصور،ڈی پی او قصور اور ڈی ایس پی ٹریفک سے فوری نوٹس لے کربلھے شاہ ڈسٹرکٹ ہسپتال کے مین گیٹ اور چوک سے غیر قانونی رکشہ اور مزدا ویگنوں کے سٹینڈ ختم کرنے کا مطالبہ کیا ہے تاکہ ہسپتال آنے والے مریضوں اور ان کے لواحقین کو آمدورفت میں مشکلات کا سامنا نہ کرنا پڑے۔ تفصیل کے مطابق بلھے شاہ ڈسٹرکٹ ہسپتا ل قصور کے مین گیٹ اور سٹیل باغ چوک میں رکشہ اور مزدا ویگنوں کے غیر قانونی سٹینڈ قائم ہوچکے ہیں جو یہاں گھنٹوں کھڑے رہ کر سواریاں بٹھاتے ہیں جس کے باعث ہسپتال کے مین گیٹ اور سٹیل باغ چوک میں ٹریفک جام ہونے سے گاڑیوں کی لمبی قطاریں لگ جاتی ہیں جس سے ہسپتال آنے والے مریضوں کو لانے اور لے جانے میں سخت مشکلات کا سامنا کرنا پڑتا ہے۔ قانون پر عمل درآمد کرانے والی ٹریفک پولیس کی بات کی جائے تو ٹریفک اہلکار اپنی ڈیوٹیوں سے غائب اور شہر کے داخلی و خارجی راستوں پر ”دیہاڑیاں“ لگانے میں مصروف رہتے ہیں۔ اگر کبھی کبھارٹریفک اہلکارڈیوٹی پر موجود بھی ہوں تووہ رکشوں اور منی مزدا ویگنوں کے ڈرائیورز سے ”مال پانی“ اکٹھا کرکے وہاں سے غائب ہو جاتے ہیں۔ شہریوں نے ڈپٹی کمشنر قصور،ڈی پی او قصور اور ڈی ایس پی ٹریفک سے فوری نوٹس لے کربلھے شاہ ڈسٹرکٹ ہسپتال کے مین گیٹ اور چوک سے غیر قانونی رکشہ اور مزدا ویگنوں کے سٹینڈ ختم کرنے کا مطالبہ کیا ہے تاکہ ہسپتال آنے والے مریضوں اور ان کے لواحقین کو آمدورفت میں مشکلات کا سامنا نہ کرنا پڑے۔
