جعلی کمپنی کیخلاف ایف آئی اے نے تحقیقات مکمل کر لیں
لاہور( نامہ نگار) چین پاکستان اقتصادی راہداری منصوبے کو بدنام کرنے والی جعلی کمپنی کے خلاف ایف آئی اے نے تحقیقات مکمل کر لیں،سی پیک منصوبے کے نام پر اراضی اور لاکھوں روپے ہتھیانے والے گینگ کے دو کارندوں کے خلاف مقدمہ درج کر لیا۔ نجی ٹی وی کے مطابق ملزمان نے خود کو کمپنی کا نمائندہ ظاہر کیا اور شکایت کنندہ سے پچاس لاکھ روپے نقد کے علاوہ دو کروڑ روپے مالیت کا کمرشل پلازہ ہتھیا لیا۔اسی طرح ملزمان نے ساڑھے چار کروڑ کا مکان اور سیکٹر جی ففٹین میں پانچ کنال اراضی بھی ہتھیا لی جس سے شکایت کنندہ کو مجموعی طور پر دس کروڑ روپے سے زائد کا بھاری مالی نقصان ہوا۔تحقیقات میں یہ بات بھی سامنے آئی کہ ملزمان کا غیر ملکی کمپنی سے کوئی تعلق نہیں اور ان کا پورا منصوبہ جعلی، فرضی اور فراڈ پر مبنی تھا۔ ملزمان کے خلاف پہلے بھی مالی فراڈ کے درجنوں مقدمات درج ہیں جن کی بنیاد پر ایف آئی اے نے کارروائی کی۔