ذیشان ڈھڈی کے قتل کے خلاف (آج )ہڑتال کا اعلان

لاہور( نامہ نگار )پنجاب بار کونسل کے وائس چیئرمین چوہدری محمد اشفاق کہوٹ اور چیئرمین ایگزیکٹو کمیٹی ذبیع اللہ ناگرہ نے ڈسٹرکٹ بار ایسوسی ایشن جھنگ کے سابقہ صدر مہر منیر سدھانہ اور بار ایسوسی ایشن وہاڑی کے ممبر محمد ذیشان ڈھڈی کے قتل کی شدید مذمت کرتے ہوئے پیر کے روز صوبہ بھر میں ہڑتال کا اعلان کر تے ہوئے مطالبہ کیا ہے کہ واقعہ کا لائرز پروٹیکشن ایکٹ کے تحت مقدمہ درج کیا جائے ،کچہری چوک ری وائڈننگ اور ری ماڈلنگ منصوبے میں چیمبرز گرانے کے ذریعے وکلاء کے معاشی استحصال پر کوئی سمجھوتہ نہیں کیا جائے گا۔ اپنے مشترکہ بیان میںانہوںنے کہا کہ مہر منیر سدھانہ جیسے سینئر قانون دان کا بہیمانہ قتل نہایت قابل مذمت ہے،آئی جی پنجاب سے مطالبہ ہے کہ قتل میں ملوث ملزمان کے خلاف فوری کارروائی کی جائے، نامزد افراد کو گرفتار کرکے انسداد ددہشتگردی عدالت میں مقدمہ چلایا جائے ۔انہوں نے کہا کہ ذیشان ڈھڈی ایڈووکیٹ کو پولیس تھانہ ماچھیوال کی جانب سے گھر میں داخل ہو کر فائرنگ کرکے قتل کیا گیا ، پولیس کی جانب سے حقائق کو چھپایا جارہا ہے اور ملوث اہلکارںکو بچانے کی کوشش کی جارہی ہے ، مطالبہ ہے کہ اس واقعہ کا لائرز پروٹیکشن ایکٹ کے تحت مقدمہ درج کیا جائے اور شفاف انکوائری کے لئے جوڈیشل کمیشن بنایا جائے ۔انہوں نے کہاکہ مذکورہ واقعات کے خلاف آج پیر کے روز صوبہ بھرکے وکلاء ہڑتال کریں گے اور عدالتوں میںپیش نہیں ہوں گے۔ علاوہ ازیں انہوں نے مزید کہاکہ کچہری چوک ری وائڈننگ اینڈ ری ماڈلنگ منصوبے کی نشاندہی بد نیتی پر مبنی اور پر امن وکلاء کو ضلعی انتظامیہ اور دیگر اداروں سے لڑانے کی سازش ہے ،وکلاء بار کی قدیمی مسجد اوربار کے کرایہ داروں کے معاشی قتل عام کی ہر سازش کو ناکام بنائے گی ۔