قوم کا متفقہ مطالبہ ہے ملک کی خاطر میثاق معیشت کیا جائے ‘ اشرف بھٹی

لاہور( نامہ نگار )آل پاکستان انجمن تاجران کے مرکزی صدر اشرف بھٹی نے کہا ہے کہ اپوزیشن کو حکومت کی جانب مذاکرات کی پیشکش پر سنجیدگی دکھانی چاہیے ،جب تک بد اعتمادی کی فضاء ختم نہیں ہو گی مذاکرات کی بیل منڈھے نہیں چڑ ھ سکتی اس لئے ایک دوسرے کیلئے سپیس پید اکرنی چاہیے ، معاشی اشاریے بہتری کی جانب گامزن ہیں جس کے تسلسل کے لئے سیاسی استحکام نا گزیر ہے ۔ اپنے بیان میں صدر آل پاکستان انجمن تاجران اشرف بھٹی نے کہا کہ قوم کا متفقہ مطالبہ ہے کہ تمام سیاسی جماعتیں ملک کی خاطر میثاق معیشت کریں تاکہ ملک کو معاشی طور پر مضبوط بنیادیں میسر آ سکیں ۔ حکومت اور اپوزیشن سے اپیل ہے کہ مذاکرات کے عمل کو پایہ تکمیل تک پہنچانے کے لئے کھلے دل اور ذہن کے ساتھ پیشرفت کریں ، کسی بھی فریق کو سیاسی مفادات کی بجائے ملک کے مفادات کو ترجیح دینی چاہیے اور اسی میں بقاء ہے ۔