لندن (بزمن ڈاٹ کام ) برطانیہ میں پاکستان تحریک انصاف (پی ٹی آئی) کے مظاہرے کے دوران ایک افسوسناک واقعہ پیش آیا، جہاں مظاہرے کی کوریج کے دوران پی ٹی آئی کے کارکنوں نے سینئر صحافی سفینا خان پر مبینہ طور پر حملہ کر دیا۔ برطانوی پولیس نے بروقت کارروائی کرتے ہوئے سوینا خان کو حملہ آوروں سے محفوظ نکالا اور واقعے کا مقدمہ درج کر لیا ہے۔ذرائع کے مطابق سفینا خان مظاہرے کی کوریج کر رہی تھیں جب کچھ مظاہرین نے ان سے بدتمیزی کی اور کہا “ہم کسی بھی ٹی وی چینل کی کوریج نہیں چاہتے، ہمیں تم جیسے لوگ نہیں چاہییں۔”سفینا خان نے صحافتی ذمہ داری نبھاتے ہوئے کوریج جاری رکھی، جس پر پی ٹی آئی کے بعض کارکن مشتعل ہو گئے اور انہوں نے ان پر حملہ کر دیا۔ حملے کے نتیجے میں سفینا خان کو معمولی چوٹیں آئیں، جنہیں موقع پر طبی امداد فراہم کی گئی۔پولیس نے واقعے کا مقدمہ درج کر لیا ہے اور حملہ آوروں کی شناخت اور گرفتاری کے لیے تحقیقات جاری ہیں۔صحافی برادری اور انسانی حقوق کی تنظیموں نے واقعے کی شدید مذمت کرتے ہوئے مطالبہ کیا ہے کہ صحافیوں کے تحفظ کو یقینی بنایا جائے اور ذمہ دار افراد کو انصاف کے کٹہرے میں لایا جائے۔بعدازاں سامنے آنیوالی ویڈیو میں دیکھا جا سکتا ہے کہ خاتون نے ایک مرد کو گریبان سے پکڑ رکھا ہے اور کہہ رہی ہیں کہ فون اس نے کسی کو دیا ہے جو ممکنہ طورپر جھنڈے کی آڑ میں ان سے چھینا گیا تھا جس سے وہ ویڈیو بنا رہی تھیں ۔
